01.01.1970 06:00

Қалъачада янги шифо маскани иш бошлади

Қувасой шаҳридаги 3 мингдан ортиқ Қалъача аҳолиси анча йиллардан буён оилавий шифокор пунктининг бироз узоқдалигидан азият чекишарди. Шифокор кўригидан ўтиш, фарзандларини эмлашга олиб бориш учун ҳар бир фуқаро ўртача ярим кун вақт сарф этар эди. Қишлоқ фаолларнинг саъй ҳаракатлари билан ҳудудда Арсиф оилавий шифокор пунктига қарашли Қаълача маҳалла тиббиёт пункти ташкил қилишга бел боғлашди.

—Бу ташаббусни шу йилнинг январ ойидан бошладик, — дейди маҳалла фаоли Миролим Амонов. – Қишлоғимиз марказидаги қаровсиз қолган бинони шифо масканига айлантиришга ахд қилдик. Қурилиш ишларига ўзим бош-қош бўлдим. Бу ернинг одамлари сахий, бири моддий томондан ёрдам берган бўлса, бири қурилиш молларига, таъмирлаш ишларига кўмак беришди.

Бугун, катта тадбир билан бу ерда янги тиббиёт пункти очилди. Очилиш маросимида шаҳар ҳокимлиги вакиллари, тиббиёт бирлашмаси масъуллари, сектор раҳбарлари ҳамда маҳалла аҳли иштирок этди. 3 минг нафардан зиёд аҳоли истиқомат қилаётган маҳаллада бирламчи тиббий хизмат кўрсатиш сифатини яхшилаш учун муҳим қадам ташланди.

Шу пайтгача бир неча километр масофадаги оилавий шифокор пунктига боришга мажбур бўлган Бўз, Қарамқул маҳаллаларининг аҳолиси энди ўз яшаш жойларида тиббий хизматдан фойдаланади, — дейди Арсиф оилавий шифокор пункти катта ҳамшираси Мавжуда Мирзашарипова. – Муолажа, эмлов, врач олди кўруви хоналари ва кундузги стационарга эга бу масканда ишловчи 9 нафар умумий амалиёт шифокорлари ва ҳамширалар беморлар ташвишини енгил қилади.

Очилиш тадбирига келган 73 ёшли нуроний онахон Мавлудахон Тожибоева мамлакатимиз тинч бўлишини, юртбошимизни олиб бораётган ислоҳотларига ривож сўраб дуога қўл очди.