01.01.1970 06:00

Фарғонада мураккаб урологик жарроҳлик амалиёти ўтказилди

Республика даражасида ўтказиладиган баъзи мураккаб операциялар ҳудудларда ташкил этилаётганлиги бугун юзлаб фуқароларнинг оғирини енгил, узоғини яқин қилмоқда. Бу юртимизда ихтисослашган тиббиётни ривожлантириш борасидаги ислоҳотлар самарасидир.

Куни кеча ана шундай ташаббуслардан бири Республика ихтисослаштирилган урология илмий-амалий тиббиёт маркази Фарғона филиалида навбатдаги мураккаб жарроҳлик амалиётларидан бири ўтказилди. Пойтахтдан келган мутахассис – Республика ихтисослаштирилган урология илмий-амалий тиббиёт маркази директор ўринбосари Илхом Салимов раҳбарлигида марказнинг Фарғона филиали шифокорлари иштирокида ташкил этилди. 2 нафар беморда пастки сийдик йўли торайишлардаги реконструктив буккал уретропластика ҳамда йохансон бўйича уретропластика амалиётлари ўтказилди. 2 соатдан ортиқ давом этган жарроҳлик амалиёти муваффақиятли ўтди. 

Фарғона туманида яшовчи 39 ёшли Ҳасанбой Мамараҳимов анчадан бери сийдик чиқариш йўлидаги хасталикдан азият чекар эди. Касаллик зўрайиб, умумий ҳолатида салбий ўзгаришлар кузатила бошлади. Шифокорлар кўригидан сўнг, жарроҳлик амалиётига тавсия берилди. Бемор аввалига хусусий клиникаларга мурожаат этган бўлса, бироз нархи қимматлик қилди. Сўнгра вилоят ҳокимлиги томонидан маблағ ажратилиб, марказнинг Фарғона филиалида мазкур амалиёт бажарилди.

— Аҳолига урологик хизмат кўрсатиш сифатини жойларда ҳам пойтахт даражасига етказишимиз зарур, — дейди И.Салимов. Қувонарлиси, даволаниш ва баъзи операцияларни ўтказиш учун илгари пойтахтга юбориладиган беморларнинг аксари бугунги кунда шу ерда шифо топяпти. Шунингдек, жарроҳлик амалиётлари маҳорат дарси тариқасида ўтказилмоқда.

Филиал раҳбари Азизбек Юлдашевнинг таъкидлашича, бугунги кунда шифохонага мурожаат қилаётган беморлар, асосан, буйрак-тош хасталиги, простата бези, ташқи сийдик канали торайиши каби касалликлар билан шикоят қилмоқда. Марказда даво муолажаларини олиб бориш билан биргаликда малакали мутахассислар мураккаб операцияларни деярли ҳар куни амалга ошириб келмоқда.

Фарғона вилояти соғлиқни сақлаш бошқармаси Ахборот хизмати.